Рекомендовано к публикации Издательским Советом Русской Православной Церкви (ИС 13-309-1738)
Взбра́нной Воево́де, Влады́чице на́шей Богоро́дице благода́рственная пе́ния воспису́ем о явле́нии чу́дныя Ея́ ико́ны, к Не́йже притека́ющии при́сно избавля́ются от враг ви́димых и неви́димых. Ты же, Госпоже́ Небеси́ и земли́, я́ко милосе́рдая Ма́ти, приими́ ны́не ма́лое сие́ моле́ние на́ше и неотсту́пну никогда́же сотвори́ ми́лость Твою́ от нас и заступле́ние, охраня́ющи от всех бед и напа́стей нас, зову́щих Ти: Ра́дуйся, Влады́чице, ми́лостивая о нас пред Бо́гом Засту́пнице.
А́нгелов ли́цы ликовству́юще слу́жат Тебе́, Влады́чице, и, почита́юще Тя, на руку́ Твое́ю носи́вшую Творца́ ви́димыя и неви́димыя тва́ри, ико́ну Твою́ с ме́ста на ме́сто прено́сят. Мы же, земноро́днии, дивя́щеся чу́дному явле́нию ико́ны Твоея́, А́нгелы носи́мыя, вопие́м Ти си́це:
Ра́дуйся, всех Небе́сных Сил вы́сшая; ра́дуйся, вся а́нгельския чи́ны превосходя́щая.
Ра́дуйся, Честне́йшая Херуви́м; радуйся, Сла́внейшая без сравне́ния Серафи́м.
Ра́дуйся, ра́дование А́нгелов; ра́дуйся, похвале́ние лико́в небе́сных.
Ра́дуйся, от А́нгелов воспева́емая; ра́дуйся, от Серафи́мов прославля́емая.
Ра́дуйся, от Арха́нгелов покланя́емая; ра́дуйся, от во́инств небе́сных почита́емая.
Ра́дуйся, в ико́не Твое́й от А́нгелов чти́мая; ра́дуйся, в ви́димем о́бразе Твое́м от неви́димых Сил носи́мая.
Ра́дуйся, Влады́чице, ми́лостивая о нас пред Бо́гом Засту́пнице.
Ви́дяще ры́барие над пучи́ною вод носи́мую неви́димою си́лою и све́том подо́бно со́лнцу сия́ющую Твою́, Богома́ти, ико́ну с Предве́чным Младе́нцем, ры́барей призва́вшим на уловле́ние ми́ра в се́ти спасе́ния, возопи́ша: Аллилу́иа.
Ра́зум недоразуме́нный ди́внаго явле́ния ико́ны Твоея́ разуме́ти лю́дие и́щуще, уве́деша, я́ко чти́мая в Царегра́де пречестна́я ико́на в насле́дие росси́йскому ро́ду дарова́ся. Те́мже мы, благодаря́ще за ми́лость Твою́ к ро́ду на́шему, вопие́м Ти:
Ра́дуйся, Ма́ти и́стинныя жи́зни; ра́дуйся, послуша́нием Твои́м преслуша́ние Е́вы исцели́вшая.
Ра́дуйся, затворе́нный Эде́м отве́рзшая; ра́дуйся, ми́ру яви́вшая Сокруши́теля главы́ зми́евой.
Ра́дуйся, ковче́же, Умири́теля ми́раноси́вый; ра́дуйся, мир спа́сшая от потопле́ния грехо́внаго.
Ра́дуйся, ле́ствице, е́юже сни́де Бог; ра́дуйся, земны́х возводя́щая на не́бо.
Ра́дуйся, мо́ре фарао́на мы́сленнаго потопи́вшее; ра́дуйся, купино́ не опали́вшаяся все́льшимся в Тя огне́м Божества́.
Ра́дуйся, скрижа́ле богопи́санная; ра́дуйся, ка́меню, во́ду жи́зни источи́вый жа́ждущим.
Ра́дуйся, Влады́чице, ми́лостивая о нас пред Бо́гом Засту́пнице.
Си́ла Вы́шняго осеня́ше страну́ Ти́хвинскую, егда́ ико́на Пречи́стыя Богома́тере, многоча́стне явля́ющися и вре́менным пребыва́нием освяща́ющи зе́млю, к воздвиза́нию хра́мов святы́х возбужда́ше, да сла́вится и́мя Влады́чицы во сла́ву Триипоста́снаго Бо́га, Ему́же вопие́м: Аллилу́иа.
И́му́ще благоутро́бное изволе́ние, да лю́дие страны́ Ти́хвинския вожделе́ют пребыва́ния Твоего́ с ни́ми, да па́мятуют вы́ну покро́в Твой, ико́ну Твою́ явля́ла еси́ многоча́стне, до́ндеже указа́ла еси́ богоизбра́нное ме́сто вселе́ния ея́. Те́мже чудя́щеся вопие́м Ти:
Ра́дуйся, ски́ние, в не́йже всели́ся Божество́ теле́сне; ра́дуйся, Свята́я святы́х, в ню́же еди́ною вни́де ве́чный Архиере́й.